ជិតដល់ថ្ងៃចេញពីពន្ធនាគារកើតជំងឺលើសឈាមស្លាប់
10-June-2016 | ដោយ មែន កំសត់
កំពង់ចាម៖បុរសជាទណ្ឌិតវ័យ៣២ឆ្នាំម្នាក់បានស្លាប់នៅក្នុងមន្ទីរពេទ្យខេត្តកំពង់ចាមគឺប្រមាណជាងពីរម៉ោងបន្ទាប់ពីជនរងគ្រោះម្នាក់នេះមានអាការ:ឈឺក្បាលវិលមុខហើយប្រកាច់ នៅក្នុងពន្ធនាគារខេត្តនេះកាលពីម៉ោង ៣ ទៀបភ្លឺថ្ងៃទី ០៩ ខែមិថុនា ឆ្នាំ ២០១៦។
តាមការឲ្យដឹងពីលោកសុះសារីអាយុ៣៧ឆ្នាំត្រូវជាបងបង្កើតរបស់ជនរងគ្រោះដែលបានទទួលយកសាកសពពីមន្ទីរពេទ្យបានប្រាប់អ្នកសារព័ត៌មានថា ប្អូនប្រុសរបស់ខ្លួនដែលស្លាប់ឈ្មោះ សុះ សាវី អាយុ ៣២ ឆ្នាំមានទីលំនៅភូមិរកាលើ សង្កាត់សំបួរមាស ក្រុងកំពង់ចាម។ គេបានស្លាប់ដោយសារជំងឺលើសសម្ពាធឈាមខណ:ដែលនៅសល់ប្រមាណជាង១០ថ្ងៃទៀតប៉ុណ្ណោះនឹងដល់ថ្ងៃរួចផុតពីទោសេពីក្នុងពន្ធនាគារ។
លោកយន់ពៅប្រធានពន្ធនាគារខេត្តកំពង់ចាមបានប្រាប់រស្មីកម្ពុជានៅរសៀលថ្ងៃទី៩ខែមិថុនានេះថាទណ្ឌិតឈ្មោះសុះសាវីបានបញ្ជូនចេញតាមរថយន្តពីបន្ទប់ឃុំខ្លួននៃពន្ធនាគារខេត្តកំពង់ចាមនៅ ម៉ោង ៣ ទៀបភ្លឺថ្ងៃទី ០៩ មិថុនាទៅសង្គ្រោះឯមន្ទីរពេទ្យខេត្តកំពង់ចាម បន្ទាប់ពីអ្នកទោសជាជនរងគ្រោះម្នាក់នេះ បានប្រាប់អ្នកទោសដូចគ្នាថា ឈឺក្បាល វិលមុខ ហើយឃើញប្រកាច់។
ប្រភពនោះបានឲ្យដឹងថាសុះសាវីកំពុងអនុវត្តទោសពីបទជួញដូរគ្រឿងញៀនរយ:ពេលពីរឆ្នាំគឺជនរងគ្រោះម្នាក់នេះអនុវត្តទោសជិតបានសម្រេចហើយគឺនៅសល់តែជាង១០ថ្ងៃទៀតប៉ុណ្ណោះគឺថ្ងៃទី២៨ខែមិថុនាឆ្នាំ២០១៦ខាងមុខនឹងរួចខ្លួន។ តាមលិខិតបញ្ជាក់មរណភាពរបស់គ្រូពេទ្យផ្នែកសង្គ្រោះបន្ទាន់នៃមន្ទីរពេទ្យខេត្តកំពង់ចាមដែលគ្មានចុះលេខលិខិតចេញនៅថ្ងៃទី ៩ មិថុនានេះថា បុរសឈ្មោះ សុះ សាវី អាយុ ៣២ ឆ្នាំពិតជាបានស្លាប់ដោយសារសរសៃឈាមខួរក្បាលជំងឺលើសសម្ពាធឈាមកាលពីម៉ោង៥ និង ១០ នាទីថ្ងៃទី ០៩ ខែមិថុនា ឆ្នាំ២០១៦៕
ចំនួនអ្នកទស្សនា
- ថ្ងៃនេះ5041
- ម្សិលមិញ14181
- សប្តាហ៍នេះ5041
- ខែនេះ120191
- ឆ្នាំនេះ120191
- សរុប20562647